 Wayah ini Julak Dudun kamaruk banar bakunjang. Kada tahu siang, kada tahu malam sidin haur bajalan haja. Sampai-sampai bini sidin haur bamamai haja saban hari. Kabalujuran kamarian, tumatan ba-isukan sampai parak sanja, Julak Dudun kada sing bulikan. Tabarung jua, Suwanang Burut wan Isur Saluang mawarung di warung Ifin Jambul. Pas buhan Suwanang Burut wan Isur Saluang nang ditakuni bini Julak Dudun.
"Uw....Suwanang.., pian ada malihat abahnya kah tadi di sini?" bini Julak Dudun bagamat manakuni Suwanang Burut di warung Ifin Jambul. "Abahnya nang mana?" sahut Suwanang Burut. "Abahnya nang mana??? Kada salah kah pian manyahuti ngitu Suwanang? Ulun ba-isian laki sa-ikungan nya si Julak Dudun, abahnya nang mana pulang pian takunakan?" jar bini Julak Dudun.
"Kada usah bamamai gin bini Julak-ai. Kalu-ai...kuwitan nyawa nang dimaksud," sahut Suwanang Burut pulang. "Kuwitan ulun kada di sini, kuwitan ulun bulik ka rumah sidin di kampung subalah, gasan nangapa ulun batakun wan pian nang di sini?" jar bini Julak Dudun.
"Hiih pian ngini talalu banar Suwanang-ai. Lamun bini julak manyambat abahnya, itu ba-arti manakunakan Julak Dudun. Tapi kamana garang sidin sampai pian batakun parak sanja kaya ini?" jar Isur Saluang umpat bapandir.
"Kada-ai, si Julak Dudun ngini haur bakunjang haja gawian, saharian-saharian bilang kada sing bulikan haja. Hari ngini na..., tumatan ba-isukan sampai wayah ini, kada babulikan jua. Ngaran laki baganangan-an kalu kanapa-kanapa?" jar bini Julak Dudun panjang bakisah.
"Ngaran lalakian ngitu kada usah dihadangi gin bisa haja bulik bini Julak-ai. Hadangi ja di rumah, kaina sidin cungul haja," jar Ifin Jambul pulang.
"Kada! Pokoknya sampai sidin bulik hanyar aku bulik, lamun kada sing bulikan aku bagana di warung sini haja," jar bini Julak Dudun.
Kada lawas limbah itu, mancungul Nanang Klelepon, sambil mambawa habar wan bini Julak Dudun. "Nah pas banar. Tadi ulun batamu Julak Dudun di lurung, sidin bapasan, banyak gawian, bisa-bisa malam hanyar bulik," jar Nanang Klelepon mamadahi bini Julak Dudun.
Mandangar habar kaya itu, kada banyak kisah, bini Julak Dudun manduur bulik ka rumah kada sing padahan lagi, sambil rangut-rangut muha wan manggarunum saurang. "Awas haja mun bulik malam, kada kubukai lawang tu pang," jar bini Julak Dudun bamamai saurang.
Bujur jua-ai, sampai malam Julak Dudun kada sing cungulan. Pas parak tangah malam hanyar sidin bulik. Sampai di muka rumah, tuhuk sidin mangatuk lawang kada dibukai bini sidin. Sampai-sampai Julak Dudun taguring di palatar rumah. Ka-isukan harinya, bini Julak mambukai lawang. Langsung Julak Dudun bamamai. "Kanapa aku kada dibukai lawang? Guring mati kah?" jar Julak Dudun wan bini. "Tiwas pian kada ba-ingat bajalan. Ulun kada guring mati, tapi ulun guring hidup. Mandangar-ai pian mangatuk lawang bahimat," jar bini Julak. "Aku ingat haja bajalan, jaka kada ingat kada sampai ka rumah," jar Julak Dudun kada handak kalah.(deni@radarbanjarmasin.co.id)
|